Verkefnið er tvískipt. 

Í fyrri hluta verkefnisins verður undirbúnings-, þróunar- og hugmyndavinna. Stjórn verkefnisins hefur yfirumsjón með því og eru það fulltrúar samstarfsaðila sem fara með faglega og fræðilega þekkingu á verkefninu. Kristín Ragna Gunnarsdóttir, listamaður, gerir teikningar af 26. kafla Vatnsdælu og mun í framhaldi halda utan um verkefnið með kennslu í LHÍ. Hönnun refilsins verður unnin af nemendum Listaháskólans á vorönn 2011. Ístex ehf. spinnur bandið og litar það sem þarf til útsaumsins. Eingöngu verður notuð íslensk lambsull.

26. kafli refilsins - teiknaður af Kristínu Rögnu Gunnarsdóttur, afhendur í jan.2011
Fyrirmyndin leggur drög að þeim stíl sem verður notaður við kennsluna og nemendavinnuna.
Smellið á myndina til að sjá stærri mynd.
Sjáið hér myndir frá afhendingu.

Síðari þátturinn felst í að sauma út refilinn eftir teikningum sem koma frá Kristínu Rögnu og nemendum Listaháskóla Íslands. Refillinn verður saumaður við sérstak borð eða á útsaumsgrind, meðan unnið er að honum. Fyrsta sporið verður tekið á Húnavöku um miðjan júlí 2011.

Námskeið verða haldin á Blönduósi meðan refillinn er í vinnslu til að gefa þátttakendum kost á að læra refilsaum og þær vinnuaðferðir sem nauðsynlegar eru til að ljúka verkinu. Blandað verður saman útsaum og fræðslu bæði í fyrirlestrarformi og sýningarformi ásamt ferðum um söguslóðir undir leiðsögn heimamanna. Einnig fá nemendur að fara heim með þær prufur sem þeir gera á námskeiðinu sem verða síðar minjagripir. Frá upphafi útsaumsins liggur frammi bók þar sem nöfn og upplýsingar allra þeirra sem setja sín spor í refilinn verða skráð.

Verkefnið styður við menningartengda ferðaþjónustu í samvinnu við heimaaðila og felst í að kynna Vatnsdælu fyrir ferðamönnum á sem fjölbreyttastan hátt. Boðið verður upp á ferðir um svæðið, kennslu í útsaumi og námskeið. Hugmyndin er að halda námskeið undir ýmsum formerkjum t.d. fræðileg námskeið, hvíldarnámskeið, upplifunarnámskeið o.fl.  Ferðamaðurinn er ekki einungis áhorfandi, heldur einnig þátttakandi í verkinu.  Með því að sauma nokkur spor í refilinn taka þeir þátt í að koma þessari einstöku sögu á framfæri.

Þá verða hannaðir og framleiddir ýmsir minjagripir samhliða verkefninu. Þegar refillinn er tilbúinn mun hann eflaust vekja verðskuldaða eftirtekt ferðamanna sem leið eiga um Húnavatnssýslur.

Stefnt er á að staðsetning refilsins verði í Kvennaskólanum á Blönduósi, á meðan á vinnu stendur. Til frambúðar er ætlunin að koma honum fyrir í Klausturstofu á Þingeyrum ef viðbygging rís þar innan þess tíma sem áætluð verklok eru.  

Á sumrin er ætlunin að ferðafólk fái að kaupa sig inn á verkið, t.d. klukkustund í senn þar sem viðkomandi getur sett sín spor í refilinn um leið og hann lærir þennan gamla saum, refilsauminn sem einangraðist á Íslandi á miðöldum, og fá svo nafn sitt í bókina góðu.